Kebaktian ko Pertunjukan? – Om Koster

Hari minggu papagi Ba’i Ndu su necis deng dia pung pakian Rote. Bapatua feo ame selimut, taro baju putih macam ke baju koko, trus salempang ame selimut di bahu. Sonde lupa antene ti’ilangga tatelek di kepala. Bapatua mirip ke maneleo dari Rote.

Paul Bolla: Maneleo Om Koster

Sulabe’i ju sonde kalah gaya. Hiasan bulan sabit taikat di kepala. Baju putih dari bahan brokat dengan motif yang bagus, serasi dengan motif sarung rote yang mamatua pake. Bagitu mamatua melangkah bunyi klong beking ana-ana dong tabangun.

Sulabei lingkar ame tangan di Ba’i Ndu ko ajak jalan. “Jalan su bapa te nanti katong terlambat.”

Ba’i Ndu deng Sulabei hanya salah satu dari ratusan jemaat yang hari Minggu pi gereja deng pakian motif Rote semua. GMIT su tetapkan bulan Mei jadi Bulan Bahasa dan Budaya, jadi gereja minta jemaat pake pakian baganti etnis tiap minggu. Minggu pertama pake pakian Alor, minggu kedua Rote, minggu ketiga Sabu, minggu keempat baru pakian etnis Timor.

Pokoknya gereja pung suasana su sama ke ada pesta adat. Warna-warni, banyak motif, kain tenun gagah semua. Warna dong bamakan deng baju yang orang-orang pake. Apalai ada yang tambah deng macam-macam asesori.

Tapi ternyata Ba’i Ndu kelihatan sonde sejahtera. Sulabei tanda dia pung laki pung sifat. Maitua lihat bapatua pung muka su laen, dia langsung mangarti. Karna masih di gereja, bapatua diam sa. Sulabei su siap diri, pasti bapatua akan bongkar kalo su sampe rumah.

Batul yang Sulabei pikir. Abis buka pakian, bapatua pi dudu di dedegu di bawah pohon tambring di rebis rumah. Bapatua minta Sulabei pi iko duduk di dedegu ko mau omong. Mamatua iko tapi su bawa memang deng tuahopo deng tolakan lawar daun bawang.

“Tadi tu gereja ko acara pertunjukkan seni.” Ba’i Ndu mulai buka suara deng nada protes.

“Maksudnya karmana bapa.” Sulabei sangaja sonde mangarti.

“Ko kebaktian tadi tuh.” Baptua manyao pi dia pung bini.

 “Kebaktian tadi tu lebe banyak menari-menari. Kanapa ko taro dalam ibadah. Dia pung hubungan apa? Trus katong hanya jadi penonton. Batong ni pi gereja, bukan pi menonton pertunjukkan.” Ba’i Ndu omong deng nada protes.

“Itu kan bagus bapa. Apalagi para penari pake pakian daerah dan menari tarian adat. Mama rasa itu bagus.” Sulabei sonde setuju dengan Ba’i Ndu.

“Ko menurut bapa karmana.” Sulabei tanya bale.

“Menurut bapa, bukan tariannya sonde bagus.” Ba’i Ndu kasi alasan.

“Dalam ibadah itu, kan katong bertemu dengan Tuhan. Berarti katong ju musti terlibat aktif dalam ibadah. Katong jangan jadi penonton sa. Kalo katong jemaat ju terlibat, berarti ibadah tu jadi persekutuan antara umat dengan Tuhan.” Ba’i Ndu tambah semangat.

“Katong yang bersekutu tuh, bukan hanya jasmani sa, tapi juga pikiran, hati, dan jiwa kepada Tuhan. Jadi jangan bikin ibadah itu jadi kesempatan untuk buat pertunjukkan. Gereja fokus di ibadah sa…Nah, kalo mau manyanyi dan menari dengan ciri adat, lebe bae pas Bulan Bahasa dan Budaya begini gereja bikin acara pertunjukkan untuk tampilkan segala macam seni budaya. Jang cari makan puji dalam ibadah. Harus beda altar deng panggung.”

“Kalo gereja beking acara pertunjukkan, baru ful segala macam jenis seni yang memuliakan Tuhan silakan tampil. Bisa menyanyi, menari, baca puisi, drama atau apa saja. Malah bisa dilombakan. Jadi gereja kasi kesempatan jemaat dong ungkapkan dia pung penyembahan ke Tuhan sesuai deng kekayaan adat, bahasa dan budaya yang ada dalam jemaat.”

“Begitu menurut bapa. Bae ko sonde bapa pung pikiran.” Ba’i Ndu stop ko tanya bale Sulabei.

“Jadi memuliakan Tuhan dalam ibadah bukan untuk cari makan puji begitu.” Sulabei buat kesimpulan, Ba’i Ndu hanya angguk sa…

Dalam hati Sulabei bilang, ko hanya mau kastau itu sa ju, pake omong panjang lebar. Padahal, sonde salah ju to kalo jemaat tampilkan seni budaya dalam ibadah.

Sulabei langsung ator langkah pi dapur sambel manari te’o renda. “Kalo manari bagini bisa tampil di gereja ju ko sonde.”

Sulabei sangaja baganggu, Ba’i Ndu hanya senyum sa…. (paul bolla)

Leave a Reply

Your email address will not be published.