Gara-Gara Lantik Pejabat Hari Minggu – Om Koster

Paul Bolla.

Gubernur NTT ini kali lantik su beberapa bupati dong pas hari Minggu. Karena ini lain dari kebiasaan, maka jadi soal. Ada silang pendapat. Yang setuju dan tolak semua kasi dia pung alasan.

Gereja dan para hamba Tuhan ju sonde tutup mata telinga. Dong iko buka suara. Begitu ju deng Ba’i Ndu deng Sulabei.

Masi papagi Ba’i Ndu su cari hal deng maitua Sulabei waktu mama nyora lo’e ame kopi pahit deng kokis solo. Seperti biasa, Ba’i Ndu dudu di dedegu di bawah pohon tambring di muka rumah.

“Mama su tau gubernur ada lantik bupati di hari Minggu ko?” Ba’i Ndu mulai umpan.

Soalnya maitua ju dapat undangan, tapi batal pi. Maitua su siap mau pi pake kleit terbaik. Padahal biasanya maitua hanya maen kain kebaya sa. Maitua kecewa batul.

Sulabei langsung manyala. “Parsetan deng itu gubernur setan tuh. Su tau hari Minggu tuh hari gereja, kanapa ko dia pi bekin di hari Minggu. Dia mau cari hal ko?

“Mama coba pake pikiran tenang do. Jang emosi.” Ba’i Ndu coba babujuk.

“Dia tu tau pi gereja ko sonde!” Nyora Sulabei tetap nada tinggi.

“Begini mama…” Ba’i Ndu coba mangae deng kasturun suara.

“Beta dengar acara pelantikan pung jam tuh pas su kaluar gereja.”

“Tetap son bisa.” Sulabei tetap keras. “Hari minggu tuh hari beribadah, sekalian ju waktu buat keluarga. Bukan ke lu yang pamalas gereja.”

Ba’i Ndu tahedek, maitua su mulai korek pi laen ju. Ba’i Ndu mulai tapancing emosi sendiri.

“Jadi Gereja berhak atur apa sa yangg katong boleh bekin di hari Minggu, jadi ke hari keramat begitu?” Ba’i Ndu jadi iko manyala.

“Gereja dong pasti tau kalo ibadah tuh bukan sekedar pi kebaktian minggu saja ang… Kan orang bisa bekin apa sa deng kapan sa asal berguna untuk orang lain, apalai kalo juga bisa kasi mulia nama Tuhan.”

“Bapa tuh hanya pintar baomong sa.  Tapi nol kaboak. Cari tau dolo dia pung maksud apa? Kalo su salah ya salah, tenga minta maaf sa, ko jang cari alasan baputar lidah lai.”

Sulabei tetap sonde mau terima.

Ba’i Ndu lanjut trus….” Beta jadi ingat kisah kaum farisi yang mau coba jebak Yesus yang mau tolong orang lain pas hari Sabat.  Yesus sonde keberatan deng aturan soal hari Sabat. Tapi kalo harus tolong orang, biar hari Sabat ju sonde boleh jadi halangan.”

“Biar su… nasi su jadi bubur.” Sulabei sonde tanggapi paitua yang su mulai spaning.

“Itu ju bae, ame dia pung positif sa… biar gereja ada jarak tegas deng pemerintah. Harusnya begitu, supaya gereja ju bisa lebe kritis deng berani kasi suara kenabian.”

Sulabei mulai sadiki berubah.

“Biar beta tetap sonde bisa terima. Tapi biar ko katong pung mata ju tabuka.  Kadang beta rasa gereja atau pendeta dong ju mungkin ada “main mata” deng pamarentah.”

“Beta ju rasa nanti pamarenta ju dapat keuntungan asal gereja betul-betul basuara deng kritik-kritik yang membangun. Khotbah ju bisa jang asal-asal sa….  beta dengar bilang ini gubernur ju son suka anabua yang omong asal bapak senang alias ABS.”

Giliran Ba’i Ndu takuju deng maitua pung pikiran.

“Beta pung pikiran begini mama,” Baitua mulai cari perhatian kembali.

“Semua hari kan hari Tuhan. Memang ada hari perhentian untuk pi gereja. Tapi kanapa sonde boleh pelantikan pada hari Minggu? Pemerintah kan berasal dari Allah, itu katong bisa baca di Roma 13. Mestinya hari Minggu ju pemerintah boleh bikin kegiatan apa sa. Sebab selama ini pemerintah su banyak buat kegiatan pada hari Minggu, dan pelantikan bupati hanya salah satu sa…. Kanapa baru sekarang jadi soal?”

Sulabei pung tensi nae ulang. “Jang sok mangarti alkitab. Pi gereja sa pamalas ma omong Roma 13. Bapa mangarti apa? Pi gereja sa dulu, coba kumpul itu laklaki semua ko kasi kalah jumlah perempuan di gereja baru tantang parampuan baomong. Katong perempuan sonde suka baomong, tapi langsung praktek. Bukan teori.”

Sulabei mulai sama ke jagong yang babunga waktu kana minyak panas.

“Kalo beta su diam na jang sok nasehat lai. Nanti beta mau kumpul perempuan dong ko pi tanya gubernur dia pung mau apa ko lantik pejabat di hari Minggu. Biar katong jadi nabi Natan yang pi togor Raja Daud.”

Ba’i Ndu dapa skak. Baitua sonde bisa basuara lai.

“Memang susah baomong deng perempuan.” Ba’i Ndu sonde bisa buat apa-apa lai.

“Begini sa… bapa pi kastau itu pak gubernur sa e…,” Sulabei mulai sadiki tenang.

“Kastau apa?” Ba’i Ndu tanya bale.

Sulabei lanjut. “Laen kali kalo gubernur mau lantik pejabat lai, kalo itu pejabat kristen na sekalian sa bekin di hari Minggu dalam sebuah kebaktian umum, deng liturgi khusus, abis baru lanjut sesuai aturan pemerintah. Biar ko pandeta ju bisa cuci itu pamarentah pung otak ko jang korupsi deng itu pejabat dong brenti baselingkuh.”

Lihat Ba’i Ndu macam ke masih mau basuara lai, Sulabei langsung sambar.

“Jang buka mulut lai, te beta masi ada kerja banyak. Atau mau, mulai besok bekin kopi sandiri…?”

Tokek di atas pohon tambring ju iko babunyi…tokek…tokek…

Ba’i Ndu takancing memang. Sulabei ju langsung maso dapur. *** (Paul Bolla)

Tinggalkan Balasan

Alamat email Anda tidak akan dipublikasikan. Ruas yang wajib ditandai *