Tara Miti Tomi Nuku

KUPANG, www.sinodegmit.or.id, Ba’iNdu musti bekin biasa deng dia pung maitua Sulabei pung turu-tere. Paskah kedua su lewat, dong samua siang-siang dudu santai makan jagong katemak sama-sama di dapur.

Sama ke Ba’iNdu, ana dua orang, TaEk deng InaFeok ju su kabal deng mama Sulabei pung mangomel yang su sama ke liturgi hari minggu. Sapa yang barani togor ow.

Sulabei kalo su mangomel, bisa pagi katumu pagi. Dari abis Paskah bisa batahan sampe natal baru sadiki rem. Alasannya Tuhan Yesus su lahir. Bilang Tuhan Yesus ju lahir di maitua pung hati. Samua baru bisa hela nafas, kalo su mulai masok minggu adven.

Tapi ini taon agak beda. Paskah su lewat ju Sulabei tenang-tenang sa. Diam-diam TaEk, anak laki-laki pi bakorek. Dong rindu ju deng mama pung liturgi. Ba’iNdu su pe’e mata pi TaEk, tapi su terlambat.

“Paskah ini kali mangkali karna ada tema Roh Kudus ko, bikin mama agak tenang e…” TaEk cari gara-gara.

“Biar cuma sakola SR, Mama ju tau ang…” Sulabei manyao biasa sa.

Dengar Sulabei manyao deng tenang InaFeok, ana parampuan sapu dada sambel tarek nafas.

“Musim Covid19 bagini mama tenang, karna basong samua ada di rumah. Kalo mama mangomel trus, jang sampe basong tiga bisa kering di rumah. Ko mau lari sili pi mana? Pi luar Covid ma’ale sang basong…trus maso rumah kambali katong samua bisa kana, begitu?”

Dengar maitua omong bagitu, Ba’iNdu kasi jempol. Dia bangga Sulabei ju tau kalo cara kas kalah covid, cukup samua jang ada yang kaluar rumah.

“Namanya, stay at home, mama.” InaFeok sambong.

“Ho, itu su dia pung bahasa tinggi. Basong pung kaki kereta dong lumpuh, mama ju jadi sanang.” Sulabei balas sambil senyum kakumuk baru lanjut.

“Kalo sonde na, dari ayam blom turun pohon sampe nae pohon kambali, mama sonde bisa simpan kaki tangan. Basong samua ilang. Kalo beta mangomel, sementara basong sonde bisa pi mana-mana, jang sampe basong samua kering bukan karna covid, tapi karna beta pung mangomel.”

“Orang ju bisa mati bukan karna covid sa, tapi karna stres. Karna beta sayang basong samua, makanya beta tahan diri. Beta brenti mangomel. Itu tanda syukur karna basong pung kaki kareta dong tadudu di rumah.”

“Mama su salibkan mulu deng lidah, berkorban untuk katong samua.” Ba’iNdu sambong, bikin samua pica katawa, karna ternyata Sulabei pung hati talalu mulia. Sulabei ju iko katawa.

“Mama brenti mangomel karna inga ana El Asamau.”  Takuju Sulabei sebut nyong yang jadi orang pertama positif covid19 di NTT.

Ba’iNdu deng anak dong tamba heran, ternyata maitua ju tau. Lia dong samua pung muka heran, Sulabei jelaskan.

“Mama ada dengar basong dua baomong, setelah baca di hape.” Maitua mulai kasi jelas sambil liat pi TaEk dan InaFeok.

“Basong dua ada bilang kasian deng anak El. Makanya, katong samua musti berdoa kasi dia supaya dia jalani proses di rumah sakit deng baik. Batong hanya bisa dukung dia deng cara begitu sa. Brenti baomong yang bekin orang tamba susah. Kalo son bisa bantu na diam sa. Itu lebe bae. Itu su cukup.”

Ba’iNdu pung idong tamba kembang. Dia bangga deng Sulabei yang biar diam rumah, tapi sonde ketinggalan berita.

“Ini sisi bae dari corona. Selalu ada hikmah dari setiap kesusahan. Mama beking katong samua taheran-heran.” BaiNdu akhirnya buka suara puji Sulabei.

“Ko sapa pung bini do…kalo be ame orang laen, mangkali sonde jadi begini ang…” Sulabei balas deng manja puji dia pung laki, sambel kasi rapat badan palo Ba’iNdu. InaFeok deng TaEk liat deng senyum su sama ke abege sa.

Ba’iNdu balas palo Sulabei baru omong lanjut. “Tuhan ajar katong jang pikir diri sendiri. Ini corona bikin katong pung mata tabuka samua. Lu diam di rumah, orang laen selamat. Lu pake masker, orang laen sehat. Lu rajin cuci tangan deng sabun, orang laen snang. Sebab kalo sakit, samua orang pusing iko repot. Ternyata berbuat bae tu gampang sa.”

“Son usah pikir ke jago-jago mangarti covid. Cukup Lu’u di rumah, sonde badeka deng orang asing, atau jaga jarak. Begitu sa, covid su mati, dunia ju sehat. Perawat deng dokter dong ju bisa pulang ko bakumpul deng keluarga.”

Ba’iNdu brenti baomong, karena samua puku tangan.

“Ternyata…bisa ju e..” Sulabei omong sambel pange ana dua iko palo Ba’iNdu.

“Ini ju gara-gara corona”. TaEk komentar bikin samua katawa.

“Eh…” Takuju Sulabei lepas pelukan. Samua iko lepas.

“Kanapa…?” Ba’iNdu heran.

“Itu botol-botol air mineral sedang yang banya-banya di karong tuh… mau bekin apa?”

InaFeok deng TaEk balia sa. Mama Sulabei kantara ke su mulai kumat.

Ba’iNdu cepat-cepat potong. “Ohhhh….itu to. Itu namanya Botol Tara Miti Tomi Nuku.”

“Maksudnya? Bahasa apa tuh?” Sulabei tamba bingung.

Ini kali TaEk yang kasi jelas. “Waktu bulan budaya di gereja itu hari, Mama Lin Yupukoni di sabla rumah bilang itu bahasa Abui dari Alor. Bahasa Abui tuh yang paleng banyak dipake, amper di tiga kecamatan memang di Kabupaten Alor. Dipake orang Alor di Mataru, Alor Tengah Utara, Alor Barat Daya deng sebagian Lembur dan Alor Selatan.”

“Iya, tapi dia pung arti apa?” Sulabei tamba kapingin tahu.

Ba’iNdu angguk pi TaEk ko lanjut. “Tara miti tomi nuku itu bahasa syair yang artinya berbeda-beda kedudukan atau status sosial tapi katong tetap satu hati sebagai manusia.”

“Ohhhhhh….” Sulabei tarek panjang.

“Itu botol tuh bapa kasi nama Botol Tara miti tomi nuku, maksudnya, bapa mau isi deng gula aer yang ada di kumbang ko katong bagi-bagi pi tetangga dong yang jadi korban corona. Sebagai sesama manusia, batong musti satu hati, satu rasa, saling babantu. Sonde ada orang besar, orang kici, sonde ada orang hebat, orang biasa. Corona mangamok, katong samua bisa lewat. Lu’u di rumah su batul, tapi lebe bae lai, kalo ada lebe apa na jang kake’ek… babagi ko sama-sama aman. Itu praktek tara niti tomi nuku.”

Sulabei siap-siap pi palo dia pung laki, Ba’iNdu tahan.

“Brenti bapalo su, mari samua babantu isi gula aer di botol-botol. Abis itu pake masker ko jalan babagi.”

Bolom abis Ba’iNdu baomong, samua su bagarak.

“Jang lupa ba’i Kanor yang biasa batofa rumput di orang-orang pung rumah. Juga deng Ina Lape yang biasa kumpul gelas plastik bekas.” InaFeok kasi ingat TaEk yang su ada catat sapa-sapa yang dapat.

Ba’iNdu bangga deng dia pung keluarga. Dalam hati bapatua bilang: “Hadapi corona pake jurus tara miti tomi nuku.” (paul bolla)

Tinggalkan Balasan

Alamat email Anda tidak akan dipublikasikan. Ruas yang wajib ditandai *