Cara Salah Pake Masker

KUPANG, www.sinodegmit.or.id, Ba’iNdu deng dua anak TaEk deng InaFeok sama-sama dudu nonton berita di tivi. TaEk puji deng iko bangga berita-berita tentang virus corona. Dia bilang, virus corona ni bukan hanya bawa duka sa. Ada dia pung bae ju. Gara-gara corona, bikin katong ju tahu… ternyata masih ada banyak sekali orang bae.

“Batul kaka.” InaFeok ju setuju.

“Itu tadi ada berita: Pengacara dong babagi masker frei. Dong cari dana pake cara batawar diri ko rame-rame pi kasi barisi rumput-rumput di halaman kantor atau di orang-orang besar pung rumah. Dong pung upah tuh yang dong pake beli masker ko babagi frei di jalan-jalan.”

Sulabei muncul dari belakang ko maen potong InaFeok pung baomong. “Kalo pengacara yang bagi masker frei, ta’usa talalu puji. Anggap sa dong babagi rajiki dari dong pung ontong urus orang bakasus di pengadilan.”

“Bukan pengacara yang itu mama.” InaFeok potong bale.

Sulabei langsung sambong, “Na pengacara apa lai”

Trus InaFeok kasi jelas. Pengacara tuh singkatan dari orang-orang yang dapa brenti dari dong pung tampa kerja gara-gara virus corona. Dong demo di hari buruh tanggal 1 Mei pake cara bagi masker. Karna dong satu nasib su menganggur, dong kasi nama dong pung kelompok Penganggur Banyak Acara dong singkat Pengacara.

“Oh, itu hebat.” Sulabei bale puji deng katawa kitel sambil tutup mulut yang su tatutup masker.

“Dong demo mau kastunju kalo biar su jadi pengangguran tapi dong masi bisa semangat bantu sesama yang susah. Semoga kalo virus corona su ilang na dong bisa dipanggil kerja kembali.” InaFeok tamba kasi jelas.

“Betul ada itu berita tadi. Di tivi ada kastunju gambar kelompok pengacara tuh ada tepa ana-ana jual koran deng mama-bapa yang jual kacang rebus ko langsung kasi pake masker.” TaEk tambah lai.

Saat TaEk baomong, Ba’iNdu maen puku testa deng jari telunjuk tunju-tunju di kepala.

“Ko Bapa kanapa” TaEk tanya deng heran.

“Itu bukti kasi contoh yang talalu salah. Banyak aksi bagi masker frei buat kesalahan yang sama. Dong buka dari kotak ko bungkusan ko trus langsung kaspake di orang memang. Itu salah besar.”

“Salah dimana?” Ba’iNdu begitu abis baomong Sulabei deng InaFeok serempak sambong ke paduan suara.

“Dengar babae beta kastau dia pung salah waktu pake masker.” Ba’iNdu omong plan-plan ke ba’eja.

Samua langsung serius pasang telinga.

“Salah pertama. Beli sendiri ko dapa masker frei ko, orang umumnya langsung pake memang atau orang yang bantu kaspake memang.”

“Dalam hati pasti dong langsung koak.”

“Woe corona! Beta su pake masker! Lu son bisa sonto beta lai.”

“Trus…” TaEk sonde sabar.

“YANG BETUL…” Ba’iNdu sangaja omong sadiki lambat.

“Kalo dapa masker baru, MUSTI CUCI ITU MASKER PAKE SABUN DOLO, Jumur kasi kering baru aman untuk katong pake… Bukan langsung pake. Karna katong sonde tau itu masker tuh barisi ko ada virus. Biar baru lai…”

“Ohhhhhh….betul e…” Samua serempak manyao.  (paul bolla) ***

Cucilah Masker Baru Anda Dengan Sabun Sebelum Dipakai!

Tinggalkan Balasan

Alamat email Anda tidak akan dipublikasikan. Ruas yang wajib ditandai *