KUPANG, www.sinodegmit.or.id, Ayam blom turun pohon maitua Sulabei su kerja abis semua. Su sadia sarapan di meja. Sulabei ju su siap ame pakian gereja sadia deng pakian perjamuan untuk Ba’iNdu deng dua ana, TaEk deng InaFeok.
Bagitu Ba’iNdu buka kulambu ko turun dari koi, dia yakin maitua su kasi beres samua. InaFeok ju su di dapur bantu bekin pisang goreng. TaEk ju begitu. Laklaki su hela aer kasi ponu bak di kamar mandi. Dong samua su hafal maitua. Kalo matahari su nae ko masi polo bantal, nanti aer yang pi kasi bangun.
Hanya bagitu lia pakian su rapi di meja, Ba’iNdu kasi inga. “Mama e…ini virus corona su bekin katong samua kukuru’u di ruma sa. Sonde ada gereja lai.”
Sulabei bilang, “Biar dari rumah, tapi pakian tetap pakian gereja. Ini hari su hari Rabu, biasanya gereja sadia. Jadi ta’usa tunggu sore lai, ini pagi ju katong sambayang ke gereja sadia.”
Ba’iNdu langsung diam. Baitua kaluar ko pi kastau ana dong ko su abis kerja na siap su. Soalnya, kalo Sulabei su siap samua na jang basoal lai.
Samua su dudu manis deng pakian gereja sadia. Maitua bagi amplop yang su isi doi nazar untuk semua. Pas su mau manyanyi, Koba, TaEk pung kawan datang. Dia calon dokter su sakola taon ketiga. Akhirnya Koba ju iko gereja sadia di Ba’uNdu rumah. Koba senang sekali.
Abis manyanyi Kepala Yang Berdarah, Ba’iNdu pung giliran sambayang. Ba’iNdu bilang, “Gareja sadia hari Rabu ne, bantu batong untuk sadia batong pung hati, batong lia kembali batong pung hati yang paling dalam, sebelum makan perjamuan pas Jumat Agung.”
Ba’iNdu trus baca satu ayat Alkitab dari Yohanes 13:21, “Aku berkata kepadamu, sesungguhnya seorang di antara kamu akan menyerahkan Aku.”
Sebelum Ba’iNdu lanjut, Sulabei minta baomong. Maitua bilang: “Ini hari istimewa. Ada Koba sama-sama deng deng katong. Semoga ini tanda bae, sapa tau nanti Koba jadi bagian dari batong pung keluarga. Katong minta Koba carita sadiki karmana ilmu kedokteran liat katong pung hati.”
Sulabei omong begitu, TaEk deng Koba senyum malu. InaFeok hanya senyum kakumuk, sambil putar muka lia pi dia pung bapa yang sadiki heran. InaFeok tau kalo Koba ada ser sang TaEk.
Akhirnya Koba malu-malu tapi baomong ju. Koba bilang dunia kedokteran su makin maju. Misalnya, ada CT-Scan. Ini alat untuk loti ame semua bagian tubuh katong. CT-Scan bisa loti sampe kici-kici betul, untuk menolong tenaga medis buat analisa, kalo ada suatu masalah.”
Trus Sulabei potong. “Tapi, sampai saat ini, su ada ko belum alat yang bisa loti ame ko analisa apa yang ada di batong pung pikiran deng isi hati.”
“Belum ada mama.” Koba jawab sambil senyum.
“Itu yang anak dong pung ilmu masih kurang.” Sulabei sambong lai.
“Tuhan Yesus tahu Yudas Iskariot ada simpan sesuatu dalam dia pung pikiran deng hati. Ada sesuatu yang jahat deng batola-belakang deng pelajaran yang dapa dari Yesus. Dia pung kawan-kawan murid dong ju sonde tahu. 
Sebab Yudas talalu lihai sambunyi dia pung isi hati. Tapi, Tuhan Yesus tahu. Yang hebat tuh, seperti ayat yang Bapa baca tadi, Yesus masih kasi kesempatan ke Yudas untuk pikir kembali. Sapa tahu dia brenti lakukan dia pung siasat.Tapi Yudas foe, dia malah kastenga Iblis kuasai dia.”
Ba’iNdu lanjut begitu dapa sein dari Sulabei. “Sepandai-pandainya katong simpan kejahatan dan menjadi munafik di antara katong, apa yang katong simpan sonde pernah tersembunyi dari Tuhan Allah pung biji mata. Sama ke musim corona nee..”
Ba’iNdu tahan sadiki baru lanjut. Samua tunggu apa hubungan antara Yudas Iskariot deng virus corona.
“Virus corona ne bukan berasal dari Tuhan. Sama ke banyak orang bilang deng yakin begitu. Katong ta’usa basoal itu virus jahanam pung asal usul, nanti dia tamba makan puji. 
Kenyataannya itu virus ada di antara katong, bekin satu dunia kapala pusing, orang ju su ribuan yang mati. Tapi katong ambel dia pung sisi laen sa.”
“Virus corona ne, Tuhan pake sebagai alat untuk uji katong pung hati. Ana Koba bilang, CT-Scan blom bisa loti ame manusia pung isi hati deng pikiran. Tapi virus corona akan bongkar kaskaluar batong isi perut, kapala otak deng hati yang cuma pikir dia pung diri sendiri. Nanti katong akan tahu sapa yang percaya pada kuasa kasih Tuhan Allah yang akan kasi pulihkan deng kasi cukup katong pung kebutuhan semua. Virus corona ne sama Yesus kasi tanda di bacaan Alkitab tadi. Ini tanda ne, sama ke Allah di dalam kasih Kristus bersedia toe katong deng bekin baru katong pung hidup. Tuhan Yesus tahu, mau dan berharap katong ame langkah yang berbeda.”
“Tapi katong bikin apa? Katong sama ke Yudas. Di katong pung kapala otak hanya urus diri sendiri, keluarga sendiri, kelompok sendiri, urus gereja sandiri. Katong keterlaluan. Lebe parah dari Yudas.
Sulabei deng dia pung ana dong masih bolom dapa Bapa Ba’iNdu pung maksud.
“Begitu ada isu bilang panarenta mau lokdon untuk lawan corona, artinya satu kota sonde bisa bekin apa-apa, yang ada doi dong rame-rame pi borok ame dong pung barang kebutuhan semua sebanyak-banyaknya. Dong bisa lega deng rasa aman karna semua kebutuhan dong su tumpuk banyak-banyak. Toko dong ju ame kesempatan kasnae harga. Corona beking dong ontong dua, tiga atau seratus kali lipat.”
“Trus katong yang hidup pas-pasan ne, sapa yang urus. Ontong ko masi ada marungga, papaya, daun ubi kayu, boa labu, deng daun ubi jalar. Tapi karmana deng tukang parkir, tukang ojek, tukang jualan, atau buru kasar dong. Dong bisa apa? Harap pi gereja?”
“Memang ada gereja yang langsung bagarak deng dia pung doi diakonia. Tapi banyak ju yang masih ba’urat tunggu rapat, untuk bisa sapakat susah mau mati. Kapan ko dong abis rapat, orang dong su mati, bukan karna corona, tapi mati kelaparan karna banya orang pilih aman sandiri, sonde toe yang laen.”
Ba’iNdu tambah semangat. “Virus Corona su kastunju sapa yang betul-betul kaya…dong yang kaya tuh ternyata yang sonde gepe dia pung doi, tapi dong yang rela kaskaluar dong pung doi ko pi bagi-bagi sembako, sabun, deng masker deng orang-orang susah karna corona.”
“Corona ju kastunju mana hamba Tuhan, mana yang betul-betul gereja. Ada hamba Tuhan yang bilang, gereja yang tutup karna iko anjuran pamarenta tuh gereja yang sonde ada iman. Hamba Tuhan yang model bagini ne yang sebetulnya dia yang virus corona pake ayat Alkitab, tafsir iko dia pung isi perut yang bikin banyak orang tersesat dan mati kena virus waktu nekad pi acara-acara gereja yang sonde toe larangan pamarenta.”
“Gereja-gereja ju jadi kantara, mana yang besar, sedang deng gereja yang kici di masa corona. Gereja kici tuh gereja yang kaya raya, tapi dong hanya urus dong pung kebutuhan sendiri sa, hanya untuk dia pung anggota sa…taku kaskaluar doi karna sonde ada dalam program. Masi basoal ko minta keringanan setoran. Tolong ang…samua ju ada hati, pamarenta sa kasi keringan yang ada kredit di bank-bank deng lembaga keuangan.”
“Kalo gereja sedang tuh, gereja yang sibuk bahas deng kagum orang-orang, gereja-gereja lain, yang punya banyak program diakonia. 
Tapi gereja model bagini abis waktu di bagosip sa, bahas macam-macam program orang lain trus diam sa. Sonde bikin apa-apa.”
“Nah, gereja besar itu gereja yang keuangan pas-pas sa… karena itu begitu dapat info karmana lawan corona, dong batamba doi, tenaga, ketrampilan. Apa yang dong punya, dong bantu orang. Gereja siap kaen, jemaat manjaet masker, trus mama-mama dong babagi kasi sapa sa yang dong liat paling rawab kena virus, babagi beras dua ko tiga kilogram, sabun antiseptik, trus pemuda dong belajar bekin sabun untuk cuci tangan yang cepat kering.”
Sonde rasa Ba’iNdu omong su panjang. Tapi samua sonde protes. Karna kalo protes bisa tamba lama.
Semua manyanyi persembahan. Masing-masing taro dia pung persembahan di bokor kici yang ada tutup deng serbet. TaEk sorong satu amplop lai kasi Koba yang kantara bingung sonde pegang doi.
Penutup InaFeok yang sembayang. “Tuhan Yesus, terima kasih dan jaga dokter, perawat dan para medis yang bekerja deng hati, rawat orang sakit karna virus corona. Dalamnya hati katong sonde tau, tapi Tuhan tau. 
Ini kali, karena bahaya virus katong gereja di ruma sa, katong ada sadia hati, biar perjamuan kudus ditunda, tapi Tuhan tolong ketuk hati katong samua supaya ada hati rela berkorban, peduli sesama. Buang jao itu hati kake’ek. Kasi katong hati yang penuh kasih, suka menolong, dan basayang. Amin.”
Gereja sadia selesai. Sulabei bangun ko mau pi bacium seperti biasa. Tapi Ba’iNdu badiri ko tahan ke Polantas, sambil kasi ingat. “Stop sonde bole bacium.”
“Corona kurang ajar ne, laki deng ana-ana sendiri ju sonde bole basonto.” Sulabei senyum-senyum bekin samua bakatawa. ***