INA Kudji sedikit emosi dengan dia pung laki Ama Huru. Satu malam anteru Ama Huru pi mangae ikan di Dermaga Tenau pulang rumah hanya dapa mangomel. Ama Huru hanya bisa diam sa. Dia su tahu kalo Na Kudji su mengomel, jangan coba-coba balas manyao, bisa-bisa itu mangomel bisa batahan sampe satu hari anteru.
Na Kudji mangomel karena Kobus yang pi mangae sama-sama Ma Huru su pulang dahulu, bawa kabar kalo dia lihat ada tiga kali Ma Huru hela tali snar, kemungkinan dapa ikan besar. Na Kudji langsung siap bumbu kua asam. Waktu ketu balimbing di rebis rumah sa, mamatua pung aer ludah su malele. Maitua su bayangkan ikan kua asam pung sadap. Ternyata Ma Huru pulang kosong. Hanya bawa ikan kici ana satu ekor.
“Bapa, mangae karmana ko sonde dapa ikan besar?” Na Kudji tanya mangada Ma Huru yang mata su mulai berat manganto. Ma Huru sonde manyao.
“Ko Om Kobus bilang bapa ada hela stenga mati sampe tiga kali. Su pi bajual itu ikan ko? Dia pung doi dimana?” Na Kudji pung suara tamba nae, karna curiga Ma Huru su pi jual itu ikan.
Dengan mulut berat Ma Huru basuara. “Betul ina, ada tiga kali beta hela penuh semangat. “
“Trus itu ikan dimana?” Na Kudji langsung sambar.
“Sabar ko beta jelaskan…” Ma Huru bujuk dia pung maitua.
“Hela pertama beta dapa galon pica bekas air minum yang su ponu lompor. Hela kedua, beta dapa karong plastik yang ada taikat dengan karosi plastik sapotong. Terakhir agak ringan, beta kira su dapa ikan, ternyata hela ame tas plastik kresek. Beta jadi loyo memang.”
“Ternyata laut di dermaga su penuh dengan sampah plastik. Tartau setan sapa su pi buang itu barang dong. Hanya bawa sial kasi beta sa…”. Ma Huru mangomel sendiri-sendiri bikin Na Kudji jadi kasian.
Biar mangomel ma diam-diam Na Kudji su siap kasi bapatua kopi deng su bawa aer panas di ember pi taro di kamar mandi.
“Na bapa pi mandi do, beta su taro aer panas di kamar mandi, abis itu minum kopi, su ada di meja, baru istirahat su…”
Dengar Ma Huru pung cerita Na Kudji jadi inga berita yang dia nonton di tivi. Berita di tivi bilang ada ikan paus panjang 9,5 meter mati terdampar di Wakatobi, Sulawesi Tenggara. Di dalam perut ikan paus ada barang-barang seperti, botol plastik, penutup galon, sandal, botol plastik, bungkus mi instan, gelas minuman, tali rafia, karung terpal, kantong kresek.
“Orang dong su bikin rusak katong pung laut. Orang-orang yang sonde mangarti su bikin laut jadi tempat pembuangan sampah yang luas. Padahal laut mustinya jadi tempat yang kasih katong persediaan makanan.” Na Kudji boto-boto sendiri dalam hati. Dia berjanji mulai kasi kurang pake barang-barang plastik.
Sekitar sebelum tenga hari Ma Huru tabangun, pas Om Koster datang antar undangan rapat panitia natal. Ma Huru keluar dari kamar deng sonde pake baju, tapi badan dong baringat besar-besar.
Om Koster sorong undangan Ma Huru yang terima. Ma Huru ame ko baca itu undangan, baru buang dia pung plastik. Dapa lia Ama Huru buang itu plastik, Na Kudji langsung maruak.
“Bapa jangan buang itu plastik lai. Nanti katong pung nasib sama ke bapa waktu pi mangae. Karna plastik ju bisa beking rusak tanah. Plastik akan jadi racun dalam tanah, sehingga tanam apa sa itu tanaman akan merana sampe mati plan-plan.”
Lihat Ma Huru seperti ragu-ragu, Na Kudji sambung lai, “ Kalo bapa sonde percaya tanya Om Koster”
“Betul Ama.” Om Koster mulai buka suara.
“Pas Bulan Lingkungan Hidup bulan November lalu, katong banyak dapat penjelasan tentang bahaya sampah plastik. Bilang sampah plastik yang banyak berserakan di lingkungan bisa mencemari tanah, air tanah dan bisa mematikan makhluk hidup dalam tanah. Bilang nanti racun-racun dari partikel-partikel plastik akan masuk ke dalam tanah berpotensi membunuh hewan-hewan pengurai tanah, seperti cacing. Akibatnya tanah jadi kurus, sonde subur lagi. Tanaman ju bisa mati.” Om Koster cerita kembali.
“Wiii…jadi serius begitu? Pantas di tempat pembuangan sampah yang banyak deng sampah plastik, sonde ada tanaman yang hidup.” Ma Huru taheran-heran.
“Na Kudji benar Ama. Makanya katong jangan buang sembarang semua sampah yang terbuat dari plastik, terutama tas kresek. Nanti pelan tapi pasti katong sedang bunuh diri pelan-pelan hanya gara-gara plastik. Katong harus buang plastik di tempat sampah khusus plastik atau ada tulisan Non Organik, biar ada yang bisa urus untuk kurangi bahaya.”
Abis omong ju Om Koster langsung pamit. Ama Huru langsung pilih kembali sampul plastik tadi ko buang di tempat sampah yang ada tulisan “Non Organik.” (paul bolla)