Ana-ana Muda GMIT Emaus Liliba:
Sama-sama bagarak jadi Gereja Kota yang Misioner di Kupang
Guys, katong samua tau kalo hidop di kota tu ponu deng tantangan, tapi ju ponu deng peluang. Nah, Jemaat Emaus Liliba (JEL), hadir sebagai gereja kota yang punya semangat misioner, sesuai dengan Pokok-Pokok Eklesiologi GMIT. Itu tuh gereja (orang) yang bukan cuma duduk badiam di bangku ibadah, tapi aktif iko serta dalam bikin bae katong pung hidop masyarakat di Kota Kupang. Katong mau gereja tuh lebe relevan, hidop, dan jadi berkat buat samua. Ini sonde mungkin terjadi tanpa ana-ana muda ke katong.
Sebagai ana-ana muda JEL, katong diajak iko deng arak-arakan ko jadi generasi misioner yang sonde pikir diri sendiri, tapi juu mau peduli deng katong pung kota. Katong mau wujudkan Tuhan pung Firman di Yeremia 29:7: usahakan kesejahteraan kota di mana Tuhan tempatkan katong. Nah ini ada lima prinsip yang bisa jadi katong pung panduan untuk bekin ini gerakan sebagai gereja kota yang misioner:
1. Gereja Kota Yang Misioner: Misi Tu Sonde Hanya Jadi Urusan Pendeta sa.
Di JEL, misi ni sonde hanya jadi urusan satu dua orang sa. Ini panggilan untuk samua anggota jemaat, termasuk katong ana muda. Katong ju dapa pangge ko peka deng ini kondisi dunia. Kasih kritik yang membangun, dan buat aksi yang inovatif. Itu misi katong bekin lewat katong pung karja, hobi, komunitas, ju deng konten yang katong kasnae di medsos. Salama itu tu bawa nilai kerajaan Allah, na itu ju jadi bagian dari katong pung misi.
2. Kupang: Ini Kota Katong Pu Rumah, Tempat Allah Kasi Tunjuk Dia Pung Kasih.
Kupang ni sonde hanya ada di peta sa. Ini katong pung rumah. Tampa katong hidop, besar, deng berjuang. Katong percaya Allah kas tunjuk dia pung kasih pi ini kota lewat Yesus Kristus dan Roh Kudus pung karya. Jadi pas ini kota ada masalah- mau itu ketimpangan sosial, krisis lingkungan, kekerasan, deng lain-lain dong – gereja sonde bole badiam sa. Katong musti buka pintu, hadir, dan kasi solusi.
3. Gereja Kas Lengkap Dia Puu Anak Muda.
JEL sonde mau anak-anak muda ni hanya dudu nonton sa. Gereja hadir untuk jadi tampat yang kasih bekal dan semangat biar katong tau, kira-kira katong pung panggilan misioner ni apa. Jadi, dar pelayanan, pembinaan, komunitas, dan deng samua ruang baomong, katong dapa ajak ko kenal katong pung diri, katong pung potensi, dan karmana katong bisa bikin dampak. Mau itu di kampus, tampa karja, organisasi, atau dunia digital -samua bisa jadi katong pung ladang misi.
4. Gereja Tu Tampat Aman Buat Samua: Ramah, Solid, dan Penuh Sukacita.
Model City Church yang JEL hidupi ni kas ajar sang katong biar jadi komunitas yang ramah, terbuka, dan saling bakutopang. Katong mau gereja jadi tampa healing, tampa katong dapa dukungan, tampa samua orang bisa rasa Kristus pung kasih. Dan pas katong bagarak sama-sama ko bekin keadilan, bela yang lemah, dan kasi diri ko melayani itu sukacita Injil jadi katong pung pengalaman hidop.
5. Sukacita Betlehem Ada Ju Di Kupang.
Co bayangkan kalo ini kota ni ponu deng sukacita sama kek di Betlehem pas Yesus lahir. Itu sukacita tu bisa mangalir pi samua sudut yang ada di ini kota sama kek air sungai dari Yerusalem Baru (wahyu 22:1-2). Katong percaya, itu tu bukan orang carita manghayal. Itu visi bisa terjadi kalo katong sama-sama jadi agen pembaruan – ana ana muda yang bawa kasih, keadilan, deng damai kas ini kota. Kupang talalu bisa jadi tampa di mana orang dong bisa rasa itu harapan, deng pembaruan satiap hari.
Nah itu lima prinsip tu sonde hanya kas katong baca sa, ma supaya katong hidupi. Di JEL, katong ada balajar sama-sama ko jadi generasi muda yang bisa:
- Identifikasi masalah kota
- Analisis secara kritis dan iman
- Riset buat cari solusi
- Bertindak nyata bareng Tuhan.
Jadi, kalo basong mau iman yang relevan dan berdampak sesuai nilai-nilai Kerajaan Allah, komunitas yang badukung dan peka deng masalah sosial, dan hidup yang sonde hanya tentang “beta”, na mari gabung. Katong bisa kolaborasi bangun gerakan ana muda GMIT menuju gereja misioner 2031 yang berdampak nyata di ini kota dan di dunia. Mar su Gen-Z, Kupang butuh katong. ***